22 Februarie 2022
Oekraïne se president, Volodymyr Zelensky het in ‘n regstreekse uitsending gesê dat sy regering nié bang is nie en meen hulle sal geen grondgebied aan Rusland afstaan nie.
Dit kom na die Russiese president Vladimir Poetin sogenaamde vredesmagte gestuur het na twee streke in Oekraïne, wat hy ook as onafhanklike gebiede verklaar het. Zelensky het in die uitsending gesê dat hy nie bang is nie en dat die land niemand niks skuld nie.
Hy hou vol dat ‘n diplomatieke roete steeds gevolg sal word om die situasie te probeer beredder. Die Verenigde Nasies se Veiligheidsraad het ook gisteraand – plaaslike tyd – ‘n noodvergadering gehou om die gebeure in Oekraïne te bespreek.
