16 Julie 2021
Polisie in Gauteng het ‘n burgemeesterskandidaat in Roodepoort in hegtenis geneem nadat hy na bewering mense aan die Wes-Rand aangehits het om geweld te pleeg.
Die polisie het inligting opgevolg en die draad van kommunikasie nagespoor tot by ‘n toestel wat aan die verdagte behoort.
Daar is beslag gelê op die toestel waarop die oorspronklike boodskap glo opgeneem is.
Die inhegtenisname volg op die afgelope week se onluste en plundering wat in KwaZulu-Natal en Gauteng plaasgevind het.
Die verdagte se naam is nog nie bekend gemaak nie. Die waarnemende minister in die presidensie, Khumbudzo Ntshavheni het gister tydens ‘n mediakonferensie gesê dat 12 vermeende aanhitsers geïdentifiseer is.
Dit is egter nie bekend of die burgmeesterskandidaat deel van dié groep is nie.
Intussen het president Cyril Ramaphosa ook vroeër vandag tydens ‘n besoek aan Durban gesê dat die polisie op die spoor van beweerde opstokers is. Hy meen dit is duidelik dat dié onluste beplan is.
Hou Afrikaans op die lug
