21 Julie 2023
Lauren Dickason (42) se verhoor het vanoggend, Nieu-Seelandse tyd, in die hooggeregshof in Christchurch voortgeduur.
Dickason word daarvan beskuldig dat sy haar dogters, die 6-jarige Liané en tweeling Maya en Karla (2) omstreeks 20:30 op 16 September 2021 in Nieu-Seeland vermoor het, ‘n maand nadat die gesin vanuit Suid-Afrika na Timaru geëmigreer het.
LEES OOK: POLISIE GETUIG OOR TONEEL WAAR DRIE DICKASON-DOGTERTJIES VERMOOR IS
Vandag was die vyfde dag van die verhoor. Haar man Graham het reeds vanuit Suid-Afrika getuig asook kennisse van die gesin, paramedici en polisie. Onderwysers by die kinders se nuwe skool in Timaru het vanoggend getuig.
Die dag van 16 September 2021 was die tweeling se eerste dag in die betrokke skool. Dit was Liané se tweede dag. Volgens die onderwysers het hulle nog nie die gesin goed geken nie, maar meen die kinders was energiek en daar was niks aan Lauren se gedrag wat hulle laat dink het dat die kinders onveilig is nie.
LEES OOK: “EK HET NÓÓIT GEDINK HAAR DREIGEMENTE SOU ‘N WERKLIKHEID WORD NIE,” SÊ GRAHAM DICKASON IN HOF
Die adjunkhoof van die Timaru Christian School, Grant Phillips het in sy getuienis gesê dat hy (ook ‘n Suid-Afrikaner) en sy vrou die aand van 14 September die gesin by hulle huis besoek het voordat Liané die volgende oggend met skool begin het. Hy sê Lauren het aan hom vertel dat sy deur ‘n moeilike afgelope twee weke is, en dat sy gespanne voel.
