5 April 2022
‘n Onderwyser van Polokwane/ Pietersburg is gistermiddag (4 April) doodgeskiet toe hy op ‘n rooftog by ‘n BMW-handelaar ingeloop het.
Die polisiewoordvoerder in Limpopo, brigadier Motlafela Mojapelo, sê een van die rowers het homself voorgegee as ‘n kliënt wat ‘n motor wil koop.
Die rower het ‘n vuurwapen uitgepluk en op ‘n personeellid gerig toe die die 57-jarige Muofhe Levwimbe, onbewus van die omstandighede by die handelaar, ingestap het om sy motor vir ‘n diens te bring.
Levwimbe is op kort afstand geskiet en later op die toneel dood verklaar.
Die 33-jarige rower het met ‘n goue BMW weggejaag, maar is kort daarna deur die polisie vasgetrek.
Die verdagte sal binnekort in die landdroshof in Polokwane op aanklagte van moord, gewapende roof, motordiefstal en die besit van ongelisensieerde vuurwapens en ammunisie verskyn.
