12 Maart 2024
Die burgerregteorganisasie, AfriForum meen die departement van basiese onderwys moet nié die publiek se intelligensie onderskat of hulle verder moet probeer mislei nie.
Dit kom in reaksie op ‘n verklaring deur die departement wat gister uitgereik is. In die verklaring meen die departement dat die Wysigingswetsontwerp op Basiese Onderwyswette, die sogenaamde BELA-wetsontwerp, geen agenda teen ’n spesifieke taal het nie, maar juis moedertaalonderrig en beter skolebestuur sal bevorder.
Volgens AfriForum se hoof van Kultuursake, Alana Bailey, het verskeie ANC-lede op provinsiale en nasionale owerheidsvlakke al telkemale uitdruklik gesê dat die bestaan van enkelmedium Afrikaanse skole onaanvaarbaar is.
“Openbare skole getuig deurentyd van departementele druk om te verengels, al is dit herhaaldelik bewys dat dubbel- of parallelmedium onderwysinstellings in die land uiteindelik eentalige Engelse instellings word.”
Bailey meen dat die departement waarskynlik geskok is deur die groot aantal individue en instellings wat standpunt teen die BELA-wetsontwerp indien en in hulle voorleggings die departement se mislukkings op vele terreine uitwys.
