‘n Forensiese ondersoek deur ‘n diensverskaffer, het bevind dat verskeie faktore moontlik kon gelei het tot die ineenstorting van ‘n halfvoltooiide woonstelblok in George in Mei verlede jaar.
34 konstruksiewerkers is dood toe die halfvoltooiide, vyfverdieping woonstel-gebou op 6 Mei 2024 ineengestort het. Daar was 62 mense op die toneel.
Die minister van menslike nedersettings, Thembi Simelane, het vanoggend die verslag van die Nasionale Huisbouers-registrasieraad (NHBRC) se ondersoek oor die George-bouramp bekend gemaak. Volgens Simelane is dit vir die regering belangrik om die verslag bekend te maak vir deursigtigheid, en meen die voorval is in die openbare belang.
LEES OOK: George-tragedie: Nog een persoon dood
Van die bevindinge was dat daar onreëlmatighede was tydens die huisbouersertifisering- en huisbouer-graderingsproses. Die konstruksiemaatskappy het ingevolge die NHBRC se regulasies nie in sy registrasie aangedui dat hy ‘n veelvuldige verdieping-gebou beplan nie.
Die aansoekvorms van die werkers is eers op 11 Julie 2023 gefinaliseer hoewel die bouwerk geskeduleer was om reeds op 19 Junie 2023 te begin. Daar was verder ook nie voldoende inspeksies nie, met van die inspeksie-verslae wat eenhede ingesluit het wat nog nie voltooi was nie.
Ook die bevoegdheid van sommige van die konstruksiewerkers was, luidens die verslag, ook nie op standaard nie. Die George-plaaslike munisipaliteit het die gebou se bouplanne goedgekeur eers nadat die bouwerk alreeds begin het.
LEES OOK: George-tragedie plaas die kalklig op konstruksiebedryf, sê minister
Die aanbevelings sluit in dat die NHBRC se registasieproses hersien moet word, en dat ‘n span aangestel moet word om dié proses te moniteer. ‘n Volledige proses moet ook gevolg word om seker te maak dat werkers die voldoende vaardighede het.
Die ondersoeker het verder aanbeveel dat klagtes van onder meer pligversuim, wangedrag, en oneerlikheid teen die betrokke maatskappy en ander rolspelers aanhangig gemaak word.
