14 Junie 2021
Die Johannesburgse kragverskaffer, City Power het met ‘n dringende ondersoek begin te midde van bewerings dat ‘n pasgetroude paartjie dood is weens ‘n elektriese fout.
Die liggame van die 28-jarige Zaheer Sarang en sy 24-jarige vrou, Nabeelah Khan is gistermiddag in hulle huis in Crosby, Johannesburg gevind – ‘n dag nadat hulle van hulle wittebrood teruggekeer het. Hulle is twee weke gelede getroud.
Die uitvoerende hoof van City Power, Mongezi Ntsokolo het opdrag gegee dat dié voorval so gou moontlik ondersoek moet word. Berigte dui daarop dat ‘n foutiewe kragkabel verantwoordelik was vir die voorval.
Volgens berigte is Khan doodgeskok toe sy aan ‘n kraan in die stort geraak het. Haar man is dood toe hy glo na die stort gehaas het om sy vrou te probeer red.
Intussen sê die polisiewoordvoerder, kaptein Mavela Masondo dat ‘n geregtelike doodsondersoek gedoen word. Hy sê die polisie wag nou op die uitslae van ‘n nadoodse-ondersoek.
‘n Gemeenskapsaktivis in dié gebied. Aziz Ally meen kragonderbrekings is ‘n voortslepende probleem in die omgewing en meen talle inwoners het al van te vore gekla dat hulle krane hulle skok.
Hy meen dit is hartseer dat só ‘n tragedie eers moet gebeur voordat die owerhede reageer.
