10 April 2024
Die omstrede e-tol-stelsel sal môreaand (11 April) om 23:59 na byna 11 jaar tot ‘n einde kom.
Rolspelers – wat die provinsiale regering, die nasionale departement van vervoer en die padagentskap insluit – het vanoggend ‘n mediakonferensie oor die “geskiedkundige gebeurtenis” gehou.
Volgens die premier van Gauteng, Panyaza Lesufi sal die infrastruktuur van die stelsel, soos die beligting en kamerastelsel steeds gebruik word om ondermeer misdaad te probeer bekamp. Hy meen dit sal gebruik kan word om ontvoerings op te merk, asook om te soek na gesteelde voertuie.
Die minister van vervoer, Sindisiwe Chikungo, sê ingevolge wetgewing is motoriste steeds verplig om hulle skuld te betaal. Daar is egter nie duidelikheid oor historiese skuld en hoe dit hanteer sal word nie.
Sy sê gebruikers van die e-skyfie sal steeds van hierdie diens gebruik kan maak by ander tolhekke waar dit tans ook gebruik kan word.
“Mense was die afgelope 11 jaar baie krities oor e-tol, maar dit is nou water onder die brug. Dit is nou tyd om te fokus op die ANC-regering se suksesse wat die afgelope 30 jaar behaal is.”
