24 Februarie 2023
AfriForum Jeug sê hy ondersteun Beàtha Groenewald se besluit om as sekretaris van die Noordwes-Universiteit se Potchefstroomkampus-studenteraad te bedank.
Die beweging sê Groenewald se besluit om te bedank volg ná die NWU sy optrede teen haar voortgesit het – selfs nadat die raad gedwing is om haar skorsing ter syde te stel ná regsoptrede deur die beweging.
‘n Woordvoerder van AfriForum Jeug, René van der Vyver sê vyf minute nadat die Studenteraad die skorsing terug getrek het, het die voorsitter, Yikumba Andreas, ’n skrywe uitgestuur om hulle in kennis te stel van ’n buitengewone vergadering om ’n mosie van wantroue teen Groenewald aan te hoor.
Van der Vyver sê die dubbelsinnige boodskappe wat deur die NWU-strukture versprei word, saai verwarring en blyk om ’n poging te wees om die publiek ’n rat voor die oë te draai.
Sy sê dit word gesien as voortgesette boeliegedrag wat ’n studenteleier aanhou teiken nadat sy opgestaan het vir geregtigheid.
