28 Februarie 2024
Die dissiplinêre verhoor van Shaun Christie, die senior student van die Noordwes Universiteit (NWU) wat vroeër vandeesmaand tydelik geskors is na aanleiding van sy openbare beswaar oor die inhoud van ’n sessie by ’n oriënteringsgeleentheid, vind Donderdag op die universiteit se Potchefstroom-kampus plaas.
AfriForum Jeug se regspan sal Christie tydens die verhoor bystaan en ook daarop aandring dat alle aanklagtes teen hom onttrek word.
AfriForum Jeug se bestuurder, Ronald Peters sê luidens die klagstaat word Christie op vyf onderskeie aanklagtes van wangedrag aangekla. Die universiteit voer onder meer aan dat Christie homself met opset skuldig gemaak het aan “haatspraak deur studente aan te hits om teen die LGBTQIAP +-gemeenskap op te staan”.
“Daarbenewens word hy daarvan aangekla dat hy ’n universiteitsprogram opsetlik ontwrig het; die regte van die spreker van die betrokke sessie, Chloe Valerie van der Walt, geskend het; homself skuldig gemaak het aan vyandige behandeling van die LGBTQIAP +-gemeenskap; en dat hy wederregtelik en met opset ’n valse uitlating rakende die universiteit se beweerde onverdraagsaamheid teenoor Christelike waardes gemaak het,” sê Peters.
Volgens Peters misken die universiteit met hierdie aanklagtes Christie se reg tot vryheid van spraak en vryheid van assosiasie.
“Die poging om ’n aanklag van wangedrag nou selfs tot die veel ernstiger klag van haatspraak uit te brei, is onaanvaarbaar. Ons regsverteenwoordiger sal Christie bystaan en toesien dat hierdie heksejag stopgesit word,” benadruk Peters.
Christie se tydelike skorsing is op 13 Februarie gedeeltelik opgehef. Die universiteit se dissiplinêre komitee het daarmee dié vierdejaarregstudent toestemming gegee om weer sedertdien aan akademiese verrigtinge op dié kampus deelneem.
Hy word egter steeds nie toegelaat om enige van die universiteit se openbare geleenthede by te woon nie.
Foto: MambaOnline
