20 September 2022
Die Nasionale Vervolgingsgesag (NVG) het vandag die landdroshof op Glencoe ingelig dat hy nié met die vervolging van die Dundee-boer, Garth Simpson, sal voortgaan nie.
Simpson is aanvanklik van moord aangekla ná ’n voorval waarin hy op sy plaas deur ’n groep mans aangeval is.
LEES OOK: DUNDEE-BOER NA SES MAANDE IN AANHOUDING OP BORGTOG VRYGELAAT
Een van die aanvallers het glo probeer om Simpson se vuurwapen by hom af te neem toe ’n skoot afgegaan, en die man noodlottig gewond is.
AfriForum se woordvoerder vir gemeenskapsveiligheid, Jacques Broodryk, sê hoewel die voorval ‘n tragiese nadraai gehad het, is dit uit die beskikbare bewyse duidelik dat Simpson in die eerste plek nooit aangekla moes word nie.
“Ons is bly dat Simpson nou dié tragiese voorval agter hom kan sit. Alhoewel dit altyd betreurenswaardig is as iemand hul lewe verloor, is dit ons mening dat Simpson in die eerste plek nooit, op gronde van die beskikbare bewyse, aangekla moes word nie,” sê Broodryk.
