21 Februarie 2022
Die voor-vehoorverrigtinge van die omstrede asbesdak-ouditprojek is ‘n kort ruk gelede in die Bloemfonteinse hooggeregshof tot 10 Junie 2022 uitgestel.
Die ANC se geskorste sekretaris-generaal, Ace Magashule staar saam met ander hooggeplaastes aanklagte van korrupsie, bedrog en geldwassery in die gesig.
LEES OOK: ACE MAGASHULE WEER IN DIE HOF VANDAG
Die klagte hou verband met ‘n R255-miljoen tender, om asbes huise in die Vrystaat op te gradeer. Magashule was die destydse premier van die provinsie toe die tender aan die maatskappy Blackhead Consulting gegee is.
Een van die ander noemenswaardige beskuldigdes is die voormalige burgemeester van die Mangaung-metro, Olly Mlamleli.
LEES OOK: ACE MAGASHULE GESKORS NADAT HY WEIER OM OPSY TE STAAN
Magashule het aan joernaliste buite die hof gesê dat hy gereed is vir die hofsaak. Die voormalige ANC-werknemer en groot ondersteuner van Magashule, Carl Niehaus woon ook die hofverrigtinge by.
Volgens Magashule mors die Nasionale Vervolgingsgesag hulle eie tyd asook sy tyd met die saak. Hy meen daar is geen getuies op bewyse wat hom met die saak verbind nie.
