16 Mei 2024
Die Nasionale Vergadering se goedkeuring van die omstrede Wysigingswetsontwerp op Basiese Onderwyswette, oftewel die BELA-wet is vanuit verskeie oorde nié goed ontvang nie.
Dit sal nou deur president Cyril Ramaphosa onderteken moet word om dit te bekragtig.
AfriForum meen die aanvaarding van die wetsontwerp is slegs ’n volgende stap in die ANC se meedoënlose stoomrollerproses om die wetsontwerp voor die verkiesing deur te voer.
LEES OOK: SOLIDARITEIT, AFRIFORUM GEREED VIR REGSTRYD AS BELA-WET ONDERTEKEN WORD
AfriForum se hoof van Kultuursake, Alana Bailey beklemtoon dat die organisasie sal hou by die voorneme om die BELA-wetsontwerp nasionaal en, indien nodig, ook internasionaal met regsaksie teen te staan.
Die uitvoerende bestuurshoof van Solidariteit dr. Dirk Hermann meen skole is gekaap. Hermann sê die Afrikaanse gemeenskap gaan nie die wetsontwerp net aanvaar nie, en meen die regering onderskat die waarde van onderwys vir die Afrikaanse gemeenskap.
FOTO: NRP SE GOEDKEURING VAN BELA-WET DALK DIE BEGIN VAN ‘N HOFSTRYD
Hy sê Solidariteit sal die groter Afrikaanse gemeenskap mobiliseer om protes teen Bela aan te teken.
Die VF Plus-LP en hoofwoordvoerder oor onderwys, dr. Wynand Boshoff sê alhoewel hierdie wetsontwerp in die openbare deelnameproses oorweldigend verwerp is, het die ANC besluit om daarmee voort te gaan.
“Indien die president hierdie wet teken, sal dit ‘n onmiddellike regstryd ontketen. Die gebrekkige manier waarop openbare deelname in ag geneem is, asook aspekte van die wet self, sal waarskynlik in die Grondwethof draai.”
