27 Februarie 2024
Die vervaardiging van antidepressante, teensuurmiddels en sonpanele het klaarblyklik só ‘n groot invloed op die plaaslike ekonomie gehad dat dit Statistiek Suid-Afrika se lys van items gehaal het wat in die mandjie goedere opgeneem word om die PPI te bepaal.
Twaalf nuwe items vorm deel van dié mengsel wat van vanjaar af gebruik gaan word.
Die produksieprysindeks meet die verkooppryse wat binnelandse produsente vir hul produkte kry en word gesien as ‘n gevorderde aanwyser van waarheen verbruikersinflasie op pad is.
Afval, verwerkte worsies, voorbereide disse en plastiekmotoronderdele het ook die nuwe mandjie gehaal, terwyl warmwatertoestelle, rekenaars, kommunikasietoerusting, koeëllaers, motorbakwerk en linne van die vyftien items is wat uit die mandjie gehaal is.
Terwyl nie-narkotiese pynstillers – wat pynmedikasie is wat nie tot verslawing lei nie – uit die mandjie gehaal is, is gewone pynstillers, wat opioïede, alkohol of dagga kan bevat, bygevoeg.
Statistiek SA het uitgewys dat hy nie self lukraak bepaal wat in die PPI-mandjie ingaan nie, maar dat hy uitgebreide steekproewe doen om vas te stel wat prysveranderings en neigings van plaaslik-vervaardigde goedere is.
Dit dek vier breë nywerhede naamlik vervaardiging, water en elektrisiteit, mynbou asook landbou, bosbou en visserye.
