1 Oktober 2022
Die nuut-verkose burgemeester in die Johannesburgse-metro, Dada Morero het ses maande om homself te bewys, of loop die risiko om uit dié amp verwyder te word.
DIT is volgens die nuwe speaker van die metro, Colleen Makhubele. Sy is vroeër vandeesweek verkies na die DA-speaker Vasco da Gama op 1 September uit die pos verwyder is.
Morero, ‘n ANC-raadslid is gister verkies nadat ‘n mosie van wantroue teen die gewese burgemeester, Mpho Phalatse geslaag het. Makhubele het ná gister se stormagtige raadsitting gesê dat Johannesburg se inwoners staat maak op Morero om dienslewering reg te ruk.
Makhubele meen indien sy oor ses maande sien dat Morero nié sy doelwitte bereik nie sal sy nie huiwer om iemand anders in sy plek te soek nie. Volgens haar verdien die inwoners beter as wat hulle tot op hede ontvang het.
LEES OOK: COPE BEVRAAGTEKEN JHB-SPEAKER SE LIDMAATSKAP
Intussen het die ANC se voorsitter in Gauteng, Panyaza Lesufi in reaksie op die gebeure in die Johannesburgse-metro erken dat die ANC in die verlede foute gemaak het toe hul aan die stuur van die stad was, maar meen die party het uit daardie foute geleer.
Hy het na afloop van Morero se verkiesing as burgemeester, tydens ‘n mediakonferensie gesê dat die invloed van minderheidspartye nié onderskat moet word nie.
Die Patriotic Alliance, die African Independent Congress en Al Jama-ah het die ANC en EFF ondersteun in die mosie van wantroue teen Phalatse.
Die DA en ander koalisievennote het na ‘n koukusvergadering nié teruggekeer na die raadsaal nie. Lesufi meen dit is onaanvaarbaar dat die DA die raadsitting verlaat het en behoort aanspreeklik gehou te word vir hulle optrede.
