17 Maart 2022
Die vakbond, Solidariteit het die gesondheidsregulasies wat deur die minister van gesondheid, Joe Phaahla, sowel as die minister van indiensneming en arbeid, Thulas Nxesi, gepubliseer is ten sterktste veroordeel.
Volgens die vakbond is hy gereed om deel te neem aan die regsproses en te litigeer indien die onderskeie ministers voortgaan met die inwerkingstelling van dié regulasies.
LEES OOK: AFRIFORUM NADER HOF NA RAMPTOESTAND WÉÉR VERLENG WORD
Die voorgestelde wysigings sluit onder meer in dat geleenthede wat deur oningeënte mense bygewoon word, beperk word tot ‘n 1000 mense binnenshuis en 2000 in die buitelug. Die publiek kan tot die 15de April kommentaar lewer op die voorgestelde wysigings.
Die hoof van die Solidariteit Navorsingsinstituut, Connie Mulder sê feitlik al hierdie regulasies verteenwoordig dieselfde tipe maatreëls wat min of geen impak tydens die inperking gehad het nie.
“Daar is duidelik geen rasionele motivering hiervoor nie en ʼn mens kry die indruk dat die regering nou bloot net reguleer ter wille daarvan om te reguleer,” sê Mulder.
