2 April 2024
Die sporthandelsmerk, Adidas het die ontwerp van die nommer 44 op die Duitse sokkerspan se trui verbied omdat dit volgens hulle te veel lyk soos die Nazi’s se omstrede SS-brigade se simbool.
Die truie is deur die Duitse Voetbal Federasie ontwerp, en volgens Adidas was die idee nooit dat dit soos die brigade se logo moes lyk nie.
Lede van die Nazi-leier, Adolf Hitler se SS het veral diens gedoen by die honderde arbeidskampe tydens die Tweede Wêreldoorlog. Dié brigade se simbool het soos twee S’e of weerligstrale gelyk.
Nadat die trui met die nommer 44 aanlyn verkoop is, het talle mense beswaar gemaak. ‘n Duitse historikus, Michael König het die afgelope naweek op X geskryf dat dit onaanvaarbaar is dat dié trui by sokkerwedstryde toegelaat sal word.
Volgens berigte deur plaaslike media is dit onwaarskynlik dat spelers met die nommer 44 op die veld sal verskyn, maar aanhangers het nou die opsie om truie te bestel sodat die getal van hulle keuse daarop verskyn.
‘n Alternatief vir die vier word tans ontwerp.
