23 November 2023
Die Valke sê hulle is op die spoor van nóg twee verdagtes in verband met die diefstal by president Cyril Ramaphosa se Phala Phala-plaas.
$580 000 of sowat R10-miljoen wat in kontant in ‘n rusbank versteek was, is in 2020 gesteel.
Die hoof van die Valke, luitenant-generaal Godfrey Lebeya sê die verdagtes is geïdentifiseer, maar dat hulle nie tans in die land is nie. Hy het nie uitgebrei op waar hulle is en of hulle aan Suid-Afrika uitgelewer sal word nie.
Lebeya het onderneem om die media op die hoogte te hou namate die ondersoek vorder.
Drie verdagtes is in verband met die diefstal in hegtenis geneem en het reeds in die hof verskyn.
Die saak is tot 6 Desember uitgestel vir verdere ondersoek en vir een van die verdagtes die kans te gee om ‘n formele borgtogaansoek in te dien.
