24 Mei 2023
Die Gautengse gesondheidsdepartement het bevestig dat die dodetal weens cholera in Hammanskraal – noord van Pretoria – nou tot 17 gestyg het.
Volgens die departement se jongste verklaring staan die aantal laboratorium-bevestigde gevalle op 29.
Die departement se woordvoerder, Motalatale Modiba sê die Jubilee-distrikshospitaal in Hammanskraal het 165 mense met cholera-simptome behandel terwyl 67 pasiënte tans in die hospitaal opgeneem is weens gastroïntestinale infeksie.
Die departement doen ‘n beroep op lede van die publiek om na die naaste gesondheidsfasiliteit te gaan wanneer hulle sukkel met diarree, naarheid, braking, maagpyn of dehidrasie-simptome. In die res van die land is die siekte deur middel van labratoriumtoetse by 51 mense bevestig.
