23 September 2023
‘n Brand het vroeër vanmiddag by ‘n woonstelblok in Hillbrow in Johannesburg uitgebreek.
Twee vertrekke in die gebou op die hoek van Van der Merwe- en Klein-strate het glo aan die brand geslaan.
Die burgemeesterskomiteelid vir gemeenskapsveiligheid in die metro, Mgcini Tshwaku sê die Johannesburgse nooddienste is omstreeks 16:00 vanmiddag na die toneel ontbied. Twee brandweerwaens en ‘n watertenkwa was reeds op die toneel.
Volgens Tshwaku is geen beserings aangemeld nie. Dié brand kom na verskeie geboue die afgelope maand ook in die Johannesburgse-middestad in brande verwoes is. Op 31 Augustus is ‘n gekaapte gebou in Marshalltown in ‘n brand verwoes. 77 mense is dood.
Enkele dae gelede het ‘n brand uitgebreek by die Suid-Afrikaanse Inkomstediens se gebou in Marshalltown. Geen beserings is aangemeld nie.
