30 Maart 2022
Die mosie van wantroue teen president Cyril Ramaphosa in die parlement, is uitgestel.
Dit is een van twee mosies wat vandag in die Nasionale Vergadering gedebatteer sou word.
Die party wat die mosie gebring het – die ATM – het gevra dat die mosie later in die vergadering sal dien aangesien hulle ‘n hofgeding oor ‘n geheime stemming beplan.
Nadat die onderskeie partye redes vir óf teen die aanhoor van die mosie aangevoer het, het die speaker van die parlement, Nosiviwe Mapisa-Nqakula, die saak na die programkomitee terug verwys en sê daar sal Donderdag waarskynlik uitsluitsel daaroor gegee word. Die tweede mosie – wat handel oor die bevoegdheid van die kabinet – word nog gedebatteer.
Intussen sê die VF Plus dat ‘n mosie van wantroue teen die kabinet sal nouliks slaag omdat mense nie teen hul eie onbevoegdheid sal stem nie. Tog is dit net ’n kwessie van tyd voordat die ANC as regering vervang word. Insluitend die kabinet.
Die ANC herinner aan ’n seerowerskip met ’n groot bemanning en genoeg ruimte om die geplunderde ware te berg.
Die VF Plus-LP en hoofsweep, dr. Corné Mulder sê die rede vir hierdie groot bemanning kan gesien word in die ANC se nasionale konferensie (Nasrec) in 2017 toe duidelik geblyk het hoe die ANC se top-ses in twee gelyke kampe verdeel is.
“Net so met die opgeblase kabinet waar die ANC ’n balans moes vind om al die onderskeie faksies in die party te akkommodeer. Van die SAKP, Cosatu, die vroueliga, militêre veterane en die jeug tot die Radikale Ekonomiese Transformasie (RET)-faksie.”
