23 Mei 2022
Die Nasionale Energiereguleerder van Suid-Afrika het die eerste twee nuwe 100 Megawatt sonkragprojekte goedgekeur.
Dit volg op die regulatoriese verandering wat president Cyril Ramaphosa in Augustus 2021 aangekondig het, waar die Wet op Elektrisiteitsregulering gewysig is om die perk – waarvoor ‘n private kragprojek moet aansoek doen vir ‘n opwekkingslisensie – van een Megawatt tot 100 Megawatt verhoog is.
Die twee projekte is in Noordwes geleë en sal krag vir Tronox Mineral Sands opwek. Albeide projekte word deur die SOLA Groep ontwikkel, gefinansier, gebou en bedryf.
SOLA se grootste aandeelhouer en ekwiteitsvennoot in die projekte, African Rainbow Energy and Power se uitvoerende hoof, Brian Dames, sê die projekte het ook aansienlike hulp van die presidensie ontvang, wat op hul beurt gretig is om die invloed van die nuwe wetgewing te sien.
AREP word hoofsaaklik deur die miljardêr-sakeman, dr Patrice Motsepe, besit.
Die registrasie van die projekte het 73 dae geneem vanaf indiening.
