30 April 2021
‘n Beroep word opnuut op motoriste gedoen om hul spoed te verminder en om by die padreëls te hou met aanhoudende reën, wat sedert gisteraand in groot dele van Gauteng voorkom.
Omstreeks 7 uur vanoggend was daar ‘n opeenhoping van ongelukke op die N14.
Volgens ‘n verklaring deur ER24 het ‘n Ford Fiesta op die N14 in ‘n metaal-versperring vasgery en op die middelman tot stilstand gekom. Die nooddienste sê dat ‘n insleep-voertuig kort daarna op die toneel aangekom het, waarna ‘n bakkie die insleep-voertuig aan die kant van die pad getref het.
‘n Bestuurder van ‘n Volkswagen het in dieselfde tyd na bewering beheer oor sy motor verloor en gerol. Volgens ER24 het dié motor byna sy ambulans getref, wat op die toneel was.
‘n BMW het ook die versperring getref en in die stadige baan tot stilstand gekom. Ongeveer vyf voertuie was in die ongeluk betrokke.
ER24 sê ondanks die talle betrokke voertuie het slegs twee mense, een van die insleep-voertuig en ‘n ander een van die bakkie, ligte beserings opgedoen.
Intussen het ‘n vragmotorbotsing op die N1 naby die Lynnwood-uitgang in Pretoria ook ‘n opeenhoping veroorsaak.
Volgens die Emer-G-med nooddienste is talle mense beseer.
Dié nooddienste moes ook vanoggend in Johannesburg by die Gilooly’s-kruising reageer op ‘n ongeluk waarin een persoon beseer is. Volgens Emer-G-med het die bakkie ‘n paar keer gerol.
