19 April 2022
‘n Nasionale ramptoestand is afgekondig ná die vloede in KwaZulu-Natal omdat dit nié net dié provinsie is wat geraak word nie.
Dit volgens die minister van samewerkende regering en tradisionele sake, dr. Nkosazana Dlamini-Zuma, wat vanoggend ‘n mediakonferensie gehou het nadat meer as 430 mense oorlede is weens die afgelope week se weerstoestande en vloede in KZN.
Meer as 40 000 mense is dakloos gelaat. Sy sê die nasionale ramptoestand laat beter koördinering toe vir die land, regering en internasionale organisasies om bydraes te lewer en om ondersteuning aan te bied. “Die rampbestuurswet maak daarvoor voorsiening dat ‘n nasionale ramptoestand vir drie maande mag voortduur. Daarna sal besluit word of dit verleng moet word.”
LEES OOK: NASIONALE RAMPTOESTAND IN KZN AFGEKONDIG
Volgens Dlamini-Zuma kan hierdie vloede as een van die ergste natuurrampe in Suid-Afrika se geskiedenis beskou word. Sy sê tussen 11- en 12 April het daar tussen 200 mm en 400 mm se reën in dele van die provinsie geval.
“Dit is ‘n aanduiding van die uitwerking wat klimaatsverandering op die wêreld het. In Februarie, wat KZN se natste maand is, reën dit gewoonlik 120 mm – en dít in die hele maand,” het Dlamini-Zuma verduidelik.
Intussen het die hoof van die nasionale rampbestuursentrum, dr. Mmaphaka Tau gesê dat die operasionele sentrum, wat aan die begin van die Covid-19-pandemie gestig is ook nou versterk om die vloede en die uitwerking daarvan te bestuur.
