31 Maart 2021
Die Vrystaatse dorp, Brandfort en Hoffmanplein in Bloemfontein kan moontlik binnekort nuwe name kry.
Die LUR vir sport, kuns, kultuur en ontspanning in die Vrystaat, Limakatso Mahasa het gister tydens haar begrotingsrede gesê dat die plekke waarskynlik in die huidige boekjaar hernoem sal word.
Die voormalige vrou van oud-president Nelson Mandela, die ontslape Winnie Madikizela-Mandela is in 1977 na Brandfort verban. Volgens Mahasa sal dié dorp na Madikizela-Mandela vernoem word.
Wat presies die naam sal wees is nog nie bekend nie.
Die bekende Hoffmanplein in Bloemfontein kán moontlik binnekort as byvoorbeeld die Charlotte Maxeke-park bekend staan.
Die DA se koukusvoorsitter in die Vrystaatse wetgewer, James Letuka het tydens die begrotingsdebat gesê dat dié departement nie in staat is om ’n inklusiewe, kreatiewe, aktiewe en gekonnekteerde Vrystaat te skep nie.
