27 September 2023
Die stadsbestuurder van die Johannesburg-metro Floyd Brink, sê slegs R250 000 is bestee om William Nicol-rylaan in Sandton na Winnie Mandela-rylaan te herdoop.
Volgens Brink sluit dit die geld in vir die advertering van die naamsverandering, die openbare deelnameproses, en die aankoop van nuwe naamborde wat aangebring moes word.
Hy sê dit kan dalk wees dat daar ander indirekte kostes is waarvan hy nie bewus is nie.
Die metro is gekritiseer omdat hy geld en tyd spandeer aan die herbenoeming van straatname, terwyl dienslewering in die stad in duie stort.
‘n Funksie is gister (26 September) gehou om amptelik die naam te verander. Dit sou wyle Winnie Mandela se 87ste verjaarsdag gewees het.
Die premier van Gauteng, Panyaza Lesufi het tydens ‘n toespraak gesê dat Mandela dalk nie meer met ons is nie, maar dat haar nageslagte altyd sal weet wie sy was, deur haar naam te sien in Sandton. Hy sê dit is ‘n goeie dag “omdat die name van mense wat nié die swart gemeenskap verteenwoordig het nie, vervang word met pragtige name soos die van Winnie Mandela.”
