7 Junie 2023
Motoriste wat die komende naweek (10 en 11 Junie) tussen Johannesburg en Pretoria reis word daarop gewys dat die N1-deurpad nie heeltemal toeganklik sal wees in dié tyd nie.
Die padagentskap, Sanral, sê die pad sal in albei rigtings tussen die Kosmosdal-Samrand en die Rooihuiskraal-wisselaar gesluit word, sodat Eskom hoogspanningsdrade bo-oor die die pad kan span.
Sanral sê die sluitings sal stuksgewys plaasvind en word vir Saterdag tussen 06:00 die oggend en 18:00 die aand beplan, sowel as Sondag van 06:00 die oggend tot 12:00 die middag.
‘n Woordvoerder, Vusi Mona, sê motoriste sal by die betrokke afsluitings herlei word en dat daar van die R101 gebruik gemaak kan word.
