AfriForum eis optrede nadat hy ‘n boodskap op ‘n WhatsApp-groep van die Nketoana-Plaaslike Munisipaliteit in Reitz in die Vrystaat gesien het waarin ‘n direkteur na bewering geskryf het “The best is to kill the Boer”.
Volgens AfriForum se hoofwoordvoerder oor gemeenskapsveiligheid, Jacques Broodryk is die optrede deur ‘n senior bestuurslid onaanvaarbaar, en meen dit kom neer op rassisme en moedig geweld aan.
Broodryk sê daar word van openbare amptenare verwag om deur hul voorbeeld te lei en vrede en eenheid binne hul gemeenskappe te bevorder.
Volgens hom mag die erns van so ‘n stelling nie onderskat word nie. “In ’n land waar gewelddadige aanvalle op boere ’n harde werklikheid is, kan sulke stellings nie bloot aanvaar word nie.”
