19 Januarie 2023
Solidariteit het die Suid-Afrikaanse Menseregtekommissie se kwytskelding van Elana Barkhuizen – sowel as die sterk veroordeling van die optrede van Noordwes se voormalige LUR vir onderwys, Sello Lehari – verwelkom.
Barkhuizen – wat voorheen ‘n onderwyseres aan die Laerskool Schweizer-Reneke was – is in 2019 in die kollig gewerp nadat ’n foto, waarop vier swart en agtien wit leerders wat by aparte tafels in ’n klaskamer sit, wyd versprei is.
Volgens die bestuurshoof van Solidariteit, Dr. Dirk Hermann, dui die MRK se verslag daarop dat Lehari skuldig is aan die skending van Barkhuizen se reg op privaatheid, haar regte op behoorlike proses, veiligheid, vryheid van beweging en assosiasie, en boonop het hy haar menswaardigheid gekrenk.
“Barkhuizen en haar gesin is selfs gedwing om te verhuis weens ernstige kommer oor hul veiligheid nadat Lehari haar naam in die openbaar blootgelê het,” sê Hermann.
Die jongste verslag van die kommissie het ondermeer bevind dat alle bewerings – dat Barkhuizen óf die skool onbillik teen leerders gediskrimineer het – nie deur feite gestaaf word nie.
Foto: Argief
