26 September 2022
Die VF Plus sê die grumoord op die 52-jarige Gideon Swart op sy plaas net buite Emgwenya/Waterval Boven in die Emakhazeni-plaaslike munisipaliteit dien as bewys dat plaasgeweld nog steeds nie ‘n prioriteit vir die owerhede is nie.
Swart se liggaam is Vrydag gevind met steekwonde aan sy rug en maag en ’n gordel om sy enkels. Volgens ‘n polisiewoordvoerder, kolonel Donald Mdluli, is ’n saak van moord geopen en ’n soektog na die moordenaar is van stapel gestuur.
Die VF Plus se provinsiale leier in Mpumalanga, Werner Weber sê die party het ná die voorval ’n versoek aan die plaaslike LUR vir gemeenskapsveiligheid, Vusi Shongwe, gerig om samewerking tussen die polisie en landelike gemeenskappe te prioritiseer.
Weber meen dit is broodnodig dat owerhede direk met die plaasgemeenskappe saamwerk, veral aangesien hierdie slagoffers gewoonlik afgeleë leef.
Die party het ook versoek dat nabygeleë polisiekantore die plase in hul omgewing moet patrolleer, nie net om sigbare polisiëring toe te pas nie, maar ook om gereeld by plaaseienaars besoek af te lê.
