2 Augustus 2022
Motoriste word weereens gewaarsku om die Tembisa-omgewing te vermy, te midde van berigte dat die geweldadige betogings wat gister begin het, vandag voortgaan.
Inwoners betoog oor stygende munisipale tariewe en kragonderbrekings.
Die polisie het bevestig dat vier mense gister dood is tydens die geweldadige betogings. Twee van die oorledenes is deur die polisie doodgeskiet.
Die burgemeester van die Ekurhuleni-metro, Tania Campbell sê sy vermoed die betogings word aangehits deur eksterne magte wat die metro wil destabiliseer.
LEES OOK: EEN PERSOON DOODGESKIET IN TEMBISA-BETOGING
Intussen doen die Tembisa Gemeenskapsforum ‘n beroep op inwoners om rustig te raak en kalmte na die gebied te herstel.
Die forum se woordvoerder, Xolani Mnisi sê hulle is bly dat munisipale amptenare ingestem het om met gemeenskapslede te vergader, maar meen die betoging kan nie voortgaan nie – veral omdat vier mense gister dood is.
Hy sê hy voel die boodskap is gehoor en meen dit is tyd om nou terug te keer na normaal. Mnisi sê inwoners behoort nou vir die Ekurhuleni metro kans te guns om met voorstelle vorendag te kom.
