27 Julie 2023
Die DA sê die premier van Gauteng, Panyaza Lesufi het inwoners van dié provinsie mislei deur die etol-kontrak met nóg ses maande te verleng.
Volgens die DA was inwoners onder die indruk dat die e-tolstelsel geskrap is, maar weens die verlenging sal hulle nog tot minstens Desember vanjaar daarvoor moet betaal.
LEES OOK: NOG GÉÉN VORDERING MET OMSTREDE E-TOLSTELSEL NIE
Die DA se skadu-LUR vir paaie en vervoer in Gauteng, Fred Nel sê inwoners van die provinsie, maar ook alle Suid-Afrikaners, sukkel reeds om kop bo water te hou, weens hoë lewenskostes en dat die e-tolstelsel dit vererger.
“Lesufi gebruik e-tol as ‘n verkiesingsinstrument om stemme vir volgende jaar se nasionale verkiesings te werf, terwyl hy glad nie besorgd is oor die uitwerking daarvan op mense se alledaagse lewens nie.” Volgens Nel het Lesufi geen planne oor e-tol se toekoms nie.
Hy meen Lesufi kies om eerder stil te bly oor die kwessie, eerder as om opposisiepartye en ander rolspelers te nader om met ‘n praktiese, werkbare plan vorendag te kom.
LEES OOK: GEBRUIKERS MOET STÉÉDS E-TOL BETAAL, SÊ MINISTER
“Die DA het ‘n skrywe oor die e-tolstelsel aan die LUR vir paaie en vervoer, Kedibone Diale gerig waarin die party antwoorde eis oor die stelsel se toekoms asook hoe die skuld daarvoor afbetaal gaan word.”
