13 Mei 2021
Een kind is dood en drie ander beseer toe ‘n ligte motor vroeër vanmiddag op Agnes-rylaan in KyaSands, Johannesburg in ‘n groep kinders, wat aan die kant van die pad was, ingeploeg het.
Die ER24-woordvoerder, Russel Meiring sê nooddienste het omstreeks half 1 vanmiddag die motor aan die kant van die pad gevind. Vier kinders het naby die motor in die pad gelê.
Volgens hom is die kinders tussen ses- en 14 jaar oud. Meiring sê die kinders is kritiek beseer en een is op die toneel dood verklaar. Die ander drie kinders is na ‘n nabye hospitaal geneem.
Volgens Meiring het die bestuurder glo beheer oor die motor verloor. Die plaaslike owerhede stel ondersoek in.
