Deur: James Kemp
’n Mosie oor die skending van Afrikaners se regte en die noodsaak van internasionale steun gaan eersdaags in die Vlaamse parlement gedebatteer word. Dié mosie is ingedien deur Kristof Slagmulder van die politieke party Vlaams Belang.
Slagmulder voer in die mosie aan dat Vlaminge se verbintenis met die Afrikanergemeenskap terugdateer na die 17de eeu en dat die gedeelde geskiedenis nie net ’n band van solidariteit skep nie, maar ook ’n verantwoordelikheid met betrekking tot die bestaande uitdagings wat Afrikaners ervaar. Slagmulder sê dit sluit in plaasmoorde, die marginalisering van die Afrikaanse taal en die bedreiging van Afrikanerkultuurgoedere.
Die mosie verwys ook na die “opruiende en rassistiese” uitlatings van die EFF-leier, Julius Malema, en spesifiek die geleentheid op 29 Julie 2023 toe hy “Kill the boer, kill the farmer” gesing het.
In die mosie vra Slagmulder onder meer dat daar ondersoek ingestel word na die stand van menseregte van Afrikaners, dat Vlaandere en Nederland ’n beroep op die Suid-Afrikaanse regering doen vir die beskerming van Afrikaners se taal en kultuur, dat regsekerheid oor eiendomsreg verkry word, en ’n einde gemaak word aan die “straffeloosheid van Malema.”
Slagmulder vra ook dat daar amptelike gesprekke met die Afrikanergemeenskap aangeknoop word en dat die Vlaamse verteenwoordiger in Suid-Afrika verslag doen oor die stand van sake in die land.
