1 Maart 2022
Die bioskoopmaatskappy, Sterk Kinekor het ‘n aanbod van R250-miljoen gekry by die maatskappye, Blantyre Capital en Greenpoint Capital om sy bedrwyighede oor te neem en om uit sakeredding te kom.
Business Tech berig dat luidens die aanbod sal die twee maatskappye toekomstige aktiwiteite borg en ook sy sakereddingsonderhandelings oorneem.
As deel van die onderhandelinge sal Ster Kinekor se aandele van bestaande aandeelhouers oorgeplaas word na die maatskappye, wat beteken dat hulle volledige eienaarskap sal hê.
Ster Kinekor se sakeredder, Stefan Smyth sê die aanbod maak dit vir die maatskappy moontlik om op die eenvoudigste manier moontlik uit sakeredding te kom en om finansieel te herstel.
Hy sê die krediteure moet eers stem vir dié aanbod.
Ster Kinekor is aan die einde van Januarie 2021 in sakeredding geplaas te midde van die Covid-19-pandemie en die Covid-19-regulasies wat rolprentteaters beperk het.
Die maatskappy sê tot en met Februarie 2020 het hy wins getoon, maar toe tref die Covid-19-pandemie die land.
