13 Desember 2021
Ná 12 dae sonder krag is die meeste dele van Pretoria-Oos se kragtoevoer weer herstel.
Dit kom nadat ‘n brand op 1 Desember by die Mooikloof substasie uitgebreek het, wat talle inwoners sonder krag gelaat het. Die Tshwane-metro het aanvanklik beplan om die kragtoevoer Saterdag te herstel, maar reënval het die proses vertraag.
LEES OOK: METRO SÊ HY MAAK VORDERING MET HERSTELWERK AAN MOOIKLOOF
Volgens die metro se woordvoerder, Hilgard Mathews het die span deurnag gewerk om foutiewe kragkabels te herstel. Hy sê die Mooikloof Ridge-landgoed, die Woodhill-landgoed, die Pretoria Oos-hospitaal, The Wilds-landgoed en dele van Moreleta Park se kragtoevoer is herstel.
Die res van die substasie sal vandag herstel word. Volgens Mathews is die metro hoopvol dat die res van die woonbuurte teen vanmiddag krag sal hê.
