20 Maart 2023
Mmusi Maimane, die leier van die Build One South Africa politieke organisasie (BOSA) sê hy sal seker maak dat die land se ligte aangeskakel word én aanbly omdat elke Suid-Afrikaner die reg het tot basiese dienste.
BOSA en verskeie ander partye insluitend die UDM, IVP en ActionSA se saak word vandag virtueel in die Hooggeregshof in Pretoria aangehoor oor wat hulle noem die regering se georkestreerde kragkrisis.
Hulle eis onder meer die onmiddelike beëindiging van beurtkrag by skole, hospitale, polisiestasies, waterdienste en kommunikasie-infrastruktuur. Dit kom te midde van beurtkrag wat vir die eerste keer in maande tydelik opgeskort is.
Maimane sê verder dat elke mens die reg het tot ‘n werk, maar dit is slegs moontlik as daar elektrisiteit in die land is.
Die advokaat wat BOSA se saak lei, advokaat Tembeka Ngcukaitobi sê hierdie is een van die belangrikste menseregte-hofsake in die geskiedenis van die land.
Eskom het vroeër aangekondig dat beurtkrag tot môremiddag, 21 Maart opgeskort word omdat die vraag na krag laer is as wat hulle verwag het.
