16 Julie 2024
Die minister van vervoer, Barbara Creecy sê haar departement sal onmiddelik aandag skenk aan provinsiale departemente en afdelings wat nie hulle begrotings vir padherstelwerk en -instandhouding spandeer nie.
Die minister het tydens haar begrotingsdebat in die parlement gesê onderbesteding – terwyl die land se paaie verval – is onaanvaarbaar.
Sy het ook benadruk dat daar in die volgende jaar baie klem op padveiligheid gelê sal word.
Creecy sê dat daar jaarliks meer as 10 000 noodlottige botsings is. Volgens haar bereken die Padverkeerbestuurskorporasie dat dit die land byna 3% van die bruto binnelandse produk kos.
Die adjunk-minister, Mkhuleko Hlengwa het tydens sy spreekbeurt gesê dat data wys dat 87% van padongelukke deur padgebruikers se gedrag veroorsaak word, en dat die departement daarop sal fokus om mense se gedrag agter die stuur te verander.
Hy sê verder sal aandag geskenk word aan die hoeveelheid voetgangers wat doodgery word, en motors wat onpadwaardig is.
