26 Augustus 2024
Die minister van justisie se naam word nou genoem by die ondersoek na die ondergang van die VBS-onderlinge bank.
Thembi Simelane het glo ‘n lening van meer as ‘n halfmiljoen rand by Gundo Wealth Solutions aangegaan om ‘n koffiewinkel in Johannesburg te koop.
Gundo het ook in 2016 onwettige beleggings ter waarde van R349-miljoen van die Pietersburg-Polokwane-stadsraad by VBS-bank bemiddel, terwyl Simelane burgemeester van dié stad was.
Die onderneming het nagenoeg R24,2-miljoen kommissie verdien op dié transaksie.
As minister van justisie hou Simelane toesig oor die NVG – wat aktief betrokke is by die ondersoek van die ineenstorting van VBS Bank en die vervolging van diegene wat daarvoor verantwoordelik was.
