8 Augustus 2022
Die departement van vervoer en die Suid-Afrikaanse Nasionale Padagentskap (Sanral) begin vandag met hul Vala Zonke slaggate-program.
Die minister van vervoer, Fikile Mbalula sê die program sal die manier waarop dienste gelewer word verander en meen dit sal die paaie herstel tot ‘n aanvaarbare toestand. Hy sê dieselfde program sal ook in ander provinsies deur die onderskeie premiers bekend gestel word. Dié program is vanoggend deur Mbalula op die R57 in Sasolburg bekend gestel.
Hy sê tydens ‘n besoek aan die N12 in Noordwes vroeër vanjaar het hy opnuut besef in watter haglike toestand die land se paaie is en meen die toestand van die paaie is ‘n groot hindernis in die land se ekonomiese groei.
Hy sê die program sal daarop fokus om te verhoed dat paaie verder agteruitgaan, deur veral te sorg dat slaggate herstel word sodra dit vorm omdat dit volgens hom die beste manier is om toe te sien dat paaie nie verder versleg nie.
Mbalula sê Sanral sal ‘n belangrike rol speel in die uitvoering van die program. “Ons land se motoriste gaan reeds baie jare gebuk onder die swak toestand van paaie, met talle munisipaliteite wat nie die mas kan opkom en paaie herstel nie, grootliks weens te min kapasiteit.”
As deel van die program is ‘n toepassing op die been gebring, wat motoriste sal toelaat om slaggate so gou moontlik aan te meld. Dié toepassing sal saam met Sanral se reeds bestaande slaggat-toepassing werk.
