22 Mei 2024
AfriForum sê die minister van basiese onderwys, Angie Motshekga se onlangse uitlatings oor die waarde van moedertaalonderrig en haar “departement se waardering vir Afrikaanse skole, is blote oëverblindery in aanloop tot die verkiesing.”
Dit kom nadat Motshekga in haar toespraak aan onderwysbelanghebbendes by die Motheo TVET-kollege in Bloemfontein gesê het dat haar departement nié Afrikaans as moeder- en onderrigtaal sal vernietig nie.
Die kommentaar kom te midde van die omstrede Wysigingswetsontwerp op Basiese Onderwyswette wat deur die Nasionale Vergadering goedgekeur is, en nou net deur president Cyril Ramaphosa onderteken moet word.
AfriForum se hoof van kultuursake, Alana Bailey meen die publiek is nie so naïef om Motshekga se sogenaamde versekering te glo nie.
Sy sê die minister self en ander ANC-politici se venynige aanvalle op Afrikaanse skole in die verlede, maak die ware stand van sake duidelik. Volgens Bailey verengels dubbel- en parallelmediumskole redelik vinnig in Suid-Afrika.
“Die departement maak gereeld nuwe planne bekend om meer tale as tale van onderrig te bemagtig, maar in die praktyk gebeur dit nie omdat die infrastruktuur, leermateriaal en politieke wil om dit prakties uit te voer, ontbreek.”
