22 Januarie 2024
Die minister van finansies Enoch Godongwana sê hulle het gebruik gemaak van die geleentheid by die Wêreld Ekonomiese Forum in Davos in Switzerland, om hul vennote oor die wêreld heen te herinner dat Suid-Afrika groot vordering gemaak het oor die afgelope 30 jaar.
Die Suid-Afrikaanse afvaardiging het die beraad verlede week bygewoon. Hy het na afloop van sy besoek gesê dat hy dit duidelik gemaak het dat Suid-Afrika steeds ‘n uitstekende toeristebestemming is.
Godongwana het wel ook erken dat die land ’n hele rits struikelblokke in die gesig staar, om sy finansiële volhoubaarheid, ekonomiese groei vooruitsigte en besteding op maatskaplike dienste en infrastruktuur te verbeter.
Hy sê die gees van samewerking met internasionale vennote vorm deel van die land se strategie om sy ekonomiese groei weer op dreef te kry.
