26 Mei 2021
Die minister van gesondheid, dr. Zweli Mkhize sê ‘n interne ondersoek het daarop gewys dat die kontrak met die maatskappy Digital Vibes irrasioneel en onregmatig is.
Mkhize het vanoggend die media toegespreek oor die kontrak, waarvolgens Digital Vibes glo R150-miljoen ingepalm het vir die organisering van Mkhize se mediaverantwoordelikhede.
Hy sê die proses om Digital Vibes aan te stel was onreëlmatig.
LEES OOK: SOE: VERSLAG OOR BEWEERDE KORRUPSIE IN JUNIE GEREED
Mkhize het bygevoeg dat daar regstappe geneem gaan word om die geld wat spandeer is te verhaal.
Hy sê die openbare onsteltenis oor die bewerings van korrupsie met betrekking tot die Digital Vibes kontrak, is geregverdig, maar hy voel nie dat sy persoonlike bande met die personeel van Digital Vibes enigsins ‘n konflik van belange is nie.
Hy ontken ook dat sy departement se verantwoordelikhede uitgekontrakteer is aan privaat maatskappye, en sê al sy toesprake is deur die departement geskryf.
Mkhize meen daar is geen rede vir hom om afstand te doen van sy pos nie omdat hy nie gebaat het by die kontrak nie.
