15 November 2024
AfriForum sê die minister van elektrisiteit, dr Kgosientsho Ramokgopa se ingryping by die Eskom-City Power-geskil vandeesweek is net nóg ’n bewys van Panyaza Lesufi se mislukking as premier van Gauteng.
Die bestuurder van plaaslikeregeringsake by AfriForum, Morné Mostert sê Ramokgopa se suksesvolle ingryping om die geskil op te los kom nadat Eskom gedreig het om kragtoevoer na Johannesburg af te sny weens agterstallige skuld.
Mostert meen die kwessie beklemtoon Lesufi se onvermoë om sy grondwetlike verpligtinge na te kom deur onder meer die implementering van hoofstuk 3 van die Grondwet te verseker.
Die stad se skuld beloop volgens Eskom tans reeds 4-komma-9-miljard-rand, met 1-komma-4-miljard hiervan wat teen die einde van November betaalbaar is.
Hy sê Lesufi se onvermoë om Gauteng se munisipaliteite, veral Johannesburg, te bestuur, is ’n ooglopende mislukking.
“Die feit dat ’n nasionale minister moes ingryp, is ’n klad teen Lesufi se naam en toon ’n ernstige gebrek aan verantwoordbaarheid,” sê Mostert.
