24 Januarie 2025
Die burgerregteorganisasie, AfriForum doen ‘n dringende beroep op die minister van openbare werke en Infrastruktuur, Dean Macpherson, om te weier om die medeondertekenaar te wees van die omstrede onteieningswet, wat gister deur president Cyril Ramaphosa onderteken is.
AfriForum meen indien Macpherson ok die onteieningswet se proklamasie onderteken, laat hy Ramaphosa en die ANC toe om ander partye in die Regering van Nasionale Eenheid (RNE) te motiveer om omstrede wette te ondersteun.
LEES OOK: Organisasies, partye reageer op die ondertekening van die onteieningswet
Die organisasie meen dit sal van die RNE ‘n totale bespotting maak.
Die hoof van Openbare Betrekkinge by AfriForum, Ernst van Zyl sê ingevolge artikel 101(2) van die Grondwet, moet ’n skriftelike besluit van die president ook deur ’n minister onderteken word indien daardie besluit ’n funksie raak wat aan die minister opgedra is. Daarsonder kan die promulgering van ’n wet nie plaasvind nie.
Hy meen indien Macpherson die onteieningswet se inwerkingtreding as medeondertekenaar proklameer sal hy bevestig dat die ANC die opposisiepartye in die RNE ten volle geabsorbeer en geneutraliseer het.
