30 Oktober 2024
Die minister van finansies, Enoch Godongwana, het vroeër vanmiddag sy mediumtermyn-begrotingsrede gelewer.
Volgens Godongwana het die Regering van Nasionale-eenheid (RNE) – tesame met die opskorting van beurtkrag – sake- en verbruikersvertroue ’n enorme hupstoot gegee. Dit is die eerste begrotingsrede wat gelewer is sedert die RNE saamgestel is.
Hy sê die fokus van die RNE is om werk te skep, armoede te verlig en ’n etiese, bekwame en ontwikkelende staat te skep.
Volgens Godongwna bly die oorlog in die Midde-Ooste, tussen Rusland en Oekraïne en in Soedan risiko’s.
Hy het verder ook bevestig dat 70 munisipaliteite al aansoek gedoen het vir die afskrywing van hul skuld aan Eskom. Dit is mits hulle geen nuwe skuld aangaan nie.
Die minister het verder planne aangekondig om mense in die privaat sektor aan te moedig om in Suid-Afrika se infrastruktuur te belê.
Volgens Godongwana gaan ‘n sentrale punt geskep word om infrastruktuurprojekte voortdurend te evalueer, pleks van een keer per jaar. Hy sê die regering gaan nie net beleggers nader vir finansiële bydraes nie, maar om ook die meeste maak van kennis in die privaat sektor.
Hy sê konsessies, die model wat ook vir die Gautrein gebruik is, gaan nou die model word vir baie meer infrastruktuurontwikkelings.
