12 Mei 2022
Die VF Plus sê hy verwelkom die erkenning van die minister van hoër onderwys, dr. Blade Nzimande – al is dit skoorvoetend – dat Afrikaans en Nama inheemse tale is.
Hierdie erkenning volg nadat die ANC se eie regsmening hom volgens berigte van die onhoudbare posisie van sy eie mening ingelig het.
LEES OOK: KLAG BY MRK INGEDIEN NADAT MINISTER AFRIKAANS AS “UITHEEMS” BESTEMPEL
Die omstredenheid volg nadat die beleidsdokument vir hoër onderwys, wat in 2021 in werking getree het, Afrikaans en Nama nie as inheemse tale lys nie. Dit was ‘n verandering nadat opeenvolgende beleidsdokumente sedert 2001 dié tale wel as sodanig erken het.
Die VF Plus-LP en hoofwoordvoerder oor hoër onderwys, dr. Wynand Boshoff sê veel moet egter nie van hierdie ommekeer verwag word nie. “Al die agteruitgang van Afrikaans as taal van hoër onderwys het plaasgevind terwyl die inheemse status daarvan erken is.”
LEES OOK: DA HOU ‘N PLAKKAARBETOGING OOR MINISTER SE UITLATINGS OOR AFRIKAANS
Intussen het die Afrikanerbond ook hierdie erkenning van Nzimande verwelkom. Di Hoofsekretaris van die Afrikanerbond, Jan Bosman sê politieke partye en die organisasies in die burgerlike samelewing, wat die minister hieroor gekonfronteer het moet gelukwens word.
“Nzimande se afwysende en minagtende siening oor Afrikaans is welbekend en het ons vantevore ook ernstige kritiek uitgespreek oor sy taaldwalinge,” sê Bosman.
