10 September 2024
Die minister van kommunikasie, Solly Malatsi, het Maandag, 9 September Pretoria FM besoek waar die voorsitter van Pretoria FM se direksie, Willie Spies, die uitdagings waardeur gemeenskapsradiostasies in die gesig gestaar word aan hom voorgelê het, veral met betrekking tot uitsaailisensieaansoeke by die Onafhanklike Kommunikasieowerheid van Suid-Afrika (Okosa).
Dié vergadering is deur verskeie gemeenskapsradiostasies van regoor die land bygewoon, onder meer Zone Radio in Kaapstad en Wild Coast FM in Oos-Londen.
Radiostasies kla dat oormatig streng regulasies onredelik deur die Okosa toegepas word, wat beteken dat talle radiostasies hulle lisensies kwyt is.
Spies sê die doel van die minister se besoek was om ondermeer Malatsi in te lig oor die probleme wat gemeenskapstasies in die gesig staar.
Regulasies wat in 2019 deur die owerheid ingestel is, het bepaal dat radiostasies nie meer as ʼn jaar of minder as ses maande voor die vervaldatum van hul lisensie vir hernuwing van hul lisensies moet aansoek doen nie.
Minstens 20 radiostasies is deur hierdie veranderings geraak, ondermeer DeepSouth FM in Gauteng, Koepel Stereo in die Vrystaat, Kovsie FM en Med FM in Bloemfontein, asook PukFM in Noordwes.
Volgens Spies sal die radiobedryf daar onder lei indien daar nié gemeenskapsradiostasies is nie.
