8 Februarie 2022
Die minister van arbeid en indiensneming, Thulas Nxesi, het die nuwe minimumloon in die Staatskoerant gepubliseer.
Die minimumloon – wat van 1 Maart af in werking tree – beloop R23,19 per uur.
Die nuwe loon verteenwoordig ‘n verhoging van 6,9% van die vorige jaar af.
Vir die eerste keer is daar geen onderskeid getref tussen sekere groepe werkers nie, wat beteken dat huiswerkers en plaaswerkers ook nou vir dié nuwe tarief in aanmerking kom. Die nuwe minimumloon verteenwoordig dus ‘n verhoging van 21,5% vir huiswerkers.
Die aanpassings volg op ‘n onlangse voorstel deur die Nasionale Minimumloonkommissie dat huiswerkers se minimumloon gelyk gestel moet word aan die res van die land se arbeidsmag.
Werkers wat deel vorm van die departement van openbare werke se uitgebreide indiensnemingsprogram, kan aanspraak maak op R12,75 per uur.
