16 Maart 2022
Die Vrystaatse wetgewer het na bewering onderskeidelik R2,7 miljoen en R4,4 miljoen aan vanjaar se begrotings- en provinsialeredes bestee – dít terwyl dienslewering in dié provinsie tot ‘n “stilstand gekom het weens ‘n groot geldtekort.”
Die VF Plus sê in ‘n verklaring dat die R7,1 miljoen wat aan die geleenthede bestee is, is slegs die wetgewer se uitgawes en sluit nie die provinsiale departemente se besteding in nie.
“Dit is onaanvaarbaar dat die ANC in strawwe finansiële omstandighede hierdie glansgeleenthede voorhou as openbare deelname, terwyl inwoners van die provinsie honger is en by die dag verarm.” sê die VF Plus lid van die provinsiale wetgewer, Armand Cloete.
Hy sê die VF Plus het tydens die aanvang van die Covid-19-pandemie die Vrystaatse regering uitgedaag om vermaak, spyseniering, vervoer en die huur van lokale en geriewe in die komende jare te besnoei en die krane vir luukshede toe te draai.
“Die party het ook voorheen die premier, Sisi Ntombela, gewaarsku dat die party haar fyn dophou en verantwoordbaar sal hou in die hoop dat sy nie haar bynaam as partytjie-premier verder gestand doen nie.”
